ماخسرتك.. لاوربي ماخسرتك
ماخسرت الا هموم عانقت سود الليالي
من يوم ماانا عرفتك
ماخسرتك.. ماخسرتك
ماخسرت الا الشرود وماخسرت الا الكآبه..
ماخسرت الا أسئله،، كانت تدور بخاطري
ويني انا ، ووش صار فيني..؟
شي اعرفه
وشي اجهله
وعلم مابي يندرى به
ماخسرتك ،، ماخسرتك
ماخسرت الا حسايف،، وتناهيد وسوالف
ماخسرت الا هموم.. اتعبت قلبي المجازف
ماخسرتك.. ماخسرتك..
ماخسرت الا سراب.. ومن العطش كنت اتبعه
وكلما قلبي رفض يمشي مسافات الطريق.. غصب عنه اقنعه
ماخسرتك،، ماخسرتك
ماخسرت الا شقاي،، ومافقدت الا عناي
آه الليله انا ،، ياهناي ، وياهناي
ياهي الليله فرح،، ياهي الليله قصيده
ياهي من كثر الوناسه،، احسها مثل الحلم
او كني اصحى من حلم
النوم..؟؟
لا ماابي انام
ولا ابي كثر الكلام
الليله بودع جروحي،،
وهمّ مامثله في بوحي..
الليله انا متحرره ،، متمرده،، ومستكبره
الليله احس اني انا،، رجعت انا
انا اللي كنت فيما مضى
مااعرف دروب العنا
الليله لازم تنكتب بحروف من نور وذهب
( الليله غير ، شعوري غير، اشواقي غير، حتى الاغاني غير،
صدري سما واحساسي طير)
الليله انا عوّدت لي
من بعد ماكلي تشتت
الليله حتى حروفي.. من وناستها تتفلت
ماودي اذكر سيرتك
بس يله من باب ( العلم بالشي واجب)
الليله انت انتهيت..
كلك تلاشى فوق اسراب الحمام
اللي حمل كل شي عندي
وحام
حام
حام
حتى الى من ضاقت اجنحه هاك الحمام
ثارت ورميت كل اشواقي ( اللي كانت ) في بحر مظلم عميق
وانت.. دور لك صديق
ولا حد يكمل بدربك
انا ماانفع لكذبك
ولاتعيد شي من اللي كان
كان
كان
كان في الماضي .. زمااان
(( انتهينا))
كلمه بنثرها في دربك واروح
وانا ادري بك
بتبقى (( مرغم)) تبعثر جروح
لاجل تسلا
وتتسلى
بشخص ثاني
وادري انك في ثواني بينقلب جدك مزوح
بس وربي
وهذا حلفي
مااكون انا.... انا
ان وطيت الدرب ذا
او حتى عتبته وجيته
مثل مايقولون :
كبوه
وبعدها بقفي جموح
26/ 2/ 1423هـ
الثلاثاء سبتمبر 21, 2010 4:09 am
